لعنيكِ
لشفايفك
لخدودك
للحسن الراسم عودك
للصوت اللحن
للكلمة الخارجة من وسط شفايفك مبتِسمه
للنفس الخارج من بين أحضانك نسمه
لعيوني السابحة في كل بحور الشارع ...
... شايفاكِ المينا
ولنبضة ف قلبي زيادة
... بتكفينا
ولورقي الشايلك شعر
ولدمي الداخل بيكِ لعقلي
.... نقاوة .. وخمر
لجنوني الحالم فيكِ بليلة قدر
للنور ....
للفجر .... باغني
للكـــــــــــــــل باغني
-----------------------------
أوراقي الصفرا
... ملامح حزن ف بُعدِك
مهجور من بَعدِك
مسروق من جيب أفراحي
مغموس ف ملاهي جراحي
مش شايف نفسي في أي مراية
مش صاحي
مشتاق لِك
مشتاق لِك
-----------------------
خليكِ معايا ف خوف السكه
.... دفيني
وبنظرة بتعكس نور مسحور
وريني طريق الخطوة
شديني
ضميني
نسيني الرعشة
إمليني بحلم عيال ماليين بالضحك ودان الشارع
مساكة وكورة وحجلة ونطة
وشعور مجدولة
وخدود لحمارها الورد يطاطي
وملامح فكرة شقية
وردود حِمَقِيه
-------------
إمليني بحلم امبارح
مين يقدر يرجع تاني
يا حبيبتي
مين يقدر يرجع تاني؟؟
