الحدودْ

خطفت التوهة من رجليكْ
وانا حواليك باعيش وحدي
وادوَّر ع الأغاني معاكْ
ما ألاقيش ليك كلام عندي

تطوف روحي حواديتَكْ
عيال صايمة ف وطن محروقْ
قمر خانق وجوده غمامْ
وشمس حزينة مالهاش ضوءْ

أقف مسنود على جدرانْ
بتكدب ع البيوتْ بالضلْ
وبتداري هموم سكانْ
ساكنهم في سكاتهم ذُلْ

أطوف تاني حواديتَكْ
واقول لحبيبتي مش شايفِكْ
حدودي شوق لنظرة عين
وبوسة تمر بشفايفِكْ

واقولِّكْ في البعاد مواويل
يا عين يا ليل يا شوق قتَّالْ
يا معزوفة أمل عايش
برغم التوهة والترحالْ

باحبك يا .. يا عين يا ليل
وبانسى في حبك المسافاتْ
أنا بيكِ بشر كامل
ده حبك هو حب الذاتْ

تلاقيني حواديتَكْ
على جنب الطريق ممدود
تدُور حواليَّ بالطباشير
وترسم للأغاني حدود

عاطف رمزي
29 ديسمبر، 08

الشِعر واقف

في حلق باب الأمير

لا الموت بيخرج

ولا الأشعاربتتحرك بها الطوابير

وصوت مجنون

بيملا زحمة المتاريس

ويخبط كالرياح عيني بضِل الخوف:

"يعيش عتريس ... يعيش عتريس .."

عاطف رمزي

القاهرة

11 ديسمبر، 08