لحظة ميلاد (عامية)

أ‌. لحظة ميلاد (عامية)

فجأة بتنسحب الشمس
و يغوص الكون في ضلام
و بامد إيديَ
و اطبقها
على كوم أوهام

أنا مين؟
أنا حرب و خوف و خصام؟
و فلوس بتحقق أشباه أحلام؟
ولّا أنا انسان
معجون بحياه
مزروع بسلام؟
ولّا أنا مش حاجة
غير بس كلام في كلام؟

الأرض ضريح
و الشعب جريح
و النور مدبوح
على عتبة ليلة امبارح
و المنظر جارح
أطفال بتموت
أطفال برائتهم بتسافر
من حلم الله بالأرض
لعالم كافر
محكوم بمصالح
أطفال بتموت
علشان مجنون يكسب صوت
و يعيــــــــــــــــــش
على عرش
مفروش بالدم
يتسلى بموسيقى صوات
و صراخ مكتوم
و أغاني بتتغطى ببرد الليل
و تبات
في الشارع

أنا مين؟
أنا كل الجبنا العايشين
في ضل الموت؟
أنا كل الساكتين
المكسيين أوراق التوت؟
أنا كل المحبوسين في رغيف؟
أنا كل المحتاجين تعريف
و بطاقة جديدة تدخلهم
قدام الله؟
أنا كل المخنوقين بالآه؟
أنا مين؟
أنا باسأل
محتاج لإجابة


--------

ب‌. محاولات للإجابة

1- أنا حلم صغير
أنا برعم أخضر
في الطين
بيناطح كل المهزومين
و بيحلم
يوم ما هايصبح شجرة
ها يضلل مين؟
و يوكل مين؟
و ها يبني بخشبه السقف
لمين من المساكين؟

2- أنا حلم صغير
بالفرحة
على كل وشوش الأطفال
أنا حلم بيوم
تتفضى بيوت الأموال
في جيوب الفقرا
و تصير الحرب
خيال من ليلة الأمس
و تجف خطايانا الخضرا
و تموت في الشمس

3- أنا حلم صغير
باتنين اخوات
مطفية ما بينهم
نيران الذات
و بدال ما بيقفوا
الوش في وش
بيتحاضنوا
و يوحد خطواتهم حب
مسكوب في ايدين الرب
بخور صلوات

4- أنا حلم صغير
بيوحد نفسه
ف أحلامكم
و بيكبر
و يلاقي في زحمتكم
أحساس بأمان
و يقين بالغد
و بيعرف إنه
بيخرج حلم
و معاكم
يصبح
حاجة بجد
أنا حلم صغير
بالغد

عاطف رمزي
الاثنين 30/12/2002 الساعة 2ص.